वरिष्ठ अभिनेता सुनिल थापाको शव अन्तिम श्रद्धाञ्जलीका लागि चलचित्र विकास बोर्डमा राखिएको छ।उनको शनिबार बिहान ६८ वर्षको उमेरमा निधन भएको थियो। आइतबार दिउँसो १ः३० बजेसम्म उनको शव विकास बार्डमा राखिने बोर्डले जनाएको छ। त्यहाँ फिल्मकर्मीहरूले उनीप्रति अन्तिम श्रद्धाञ्जली अर्पण गर्नेछन्।

सुनिलले दर्जनौं नेपाली फिल्मका साथै बलिउड फिल्म तथा बेव सिरिजहरूमा अभिनय गरेका छन्। ‘चिनो’ फिल्ममा ‘राते काइँला’ को भूमिकाले नेपाली दर्शकमाझ अद्वितीय प्रभाव पारेको थियो। पछिल्लो समय उनी फिल्म ‘एक्लो’ मा देखिएका थिए भने ‘राम नाम सत्य’ को छायांकनमा थिए।

सुनिलको परिवार भारतको मुम्बईमा बस्दै आए पनि उनी काठमाडौंमा एक्लै बस्दै आएका थिए। परिवार काठमाडौं आएपछि शव पोस्टमार्टम गरेर श्रद्धाञ्जलीका लागि बोर्डमा राखिएको हो।